ళ్ళ

బళ్ళోకెళ్ళరువీళ్ళు

పెళ్ళికివెళ్ళుటమరువరువీళ్ళూళ్ళెళ్ళీ 

పెళ్ళిళ్ళవిందు చళ్ళా

పిళ్ళారాయుళ్ళు విందుకెళ్ళుమళ్ళీ

గుళ్ళో పందిళ్ళళ్ళిరి

ఊళ్ళో ఇళ్ళకు తలుపుకు గొళ్ళెముపెట్టే

వెళ్ళిరి వీళ్ళూవాళ్ళూ 

పెళ్ళిలో భోజనము చేసె పెళ్ళోళ్ళెళ్ళెన్

స్స

దేశము యశస్సు నోజస్సు లెస్సగుండ

బాలల వయస్సు నాయుస్సు తగ్గకుండ

చదువ మేధస్సు తేజస్సు చక్కగుండ

జరిపెడి తపస్సున మనస్సు జారకుండ

నిండిన సరస్సు వర్ఛస్సు వీడకుండ

అవని నిస్సారముస్సూరుమనకయుండ

అగ్నికి ఉషస్సు నెహవిస్సుహారతిచ్చి

ఉత్సవము చేసిరుత్సాహమొప్పధరణి.

శ్శ

ఆదర్శమే విమర్శలు

సుదర్శన! నిదర్శనమిది దుశ్శీలముకున్

యాదుశ్శాసను నిశ్శం

కదునుమ నిశ్శేషమగు మనశ్శాంతియగున్

వ్వ

నవ్వుతు దువ్వెనతో తల

దువ్వెదవూ రవ్వలడ్డు బూందీ గవ్వల్ 

బువ్వలు పెట్టెడి నవ్వుల

పువ్వువు వెలుగివ్వు దివ్వె నువ్వేనవ్వా.

ల్ల

మల్లికొకబుల్లిచెల్లీ

ఇల్లిల్లూతిరిగి చల్లతెచ్చీ మళ్ళీ

అల్లరిలేకెల్లుబడికి

తల్లికిచెల్లనదు పేరట కనకవల్లీ

ర్ర

గొర్రెల కుర్రాడెర్రని

కిర్రను చెప్పులును చర్రుచిర్రనువెర్రిన్

కర్రను నెర్రనివీగని

గుర్రము గుర్రనుచు దడిసి బుర్రునబారెన్

య్య

గొయ్యిని తియ్యకు, నుయ్యిని

ముయ్యకు, దయ్యము కలదని కుయ్యకుమయ్యా!

అయ్యనుయమ్మను నొయ్యకు

సెయ్యకు కయ్యము, గురువుతొసైయ్యనకెపుడున్.

మ్మ

అమ్మేమో మమ్ము రమ్మనె

బొమ్మల ముమ్మరము చూడ బొంబాయికినీ

వమ్మనకు , పొమ్మనమ్మా!

అమ్ముమ్మిమ్మన్న సొమ్ముమాకిమ్మమ్మా.

బ్బ

డబ్బుల డబ్బా దొబ్బిరి

సబ్బును రిబ్బను కొనవలెనబ్బా! దుబ్బున్

యుబ్బిన అల్లం రెబ్బకు

సుబ్బులు దబ్బున నిరువది రూకలు యిచ్చెన్.

ప్ప

అప్పులుసెయ్యకుమెప్పుడు

మెప్పునులేదుతెగతీర్పతిప్పలునొప్పున్

గొప్పగనొప్పరునెక్కడ

చెప్పకుమిదియప్పనితగదెప్పుడుతప్పున్

న్న

తిన్నడు కన్నును పీకన్

కన్నులు మూడున్నవైన కాదన్నావా?

ఎన్నున్నా? నీకన్నా

కన్నడి మనసెన్న వెన్నకన్నా మిన్నే!

ద్ద

ముద్దుగ పెద్దలు వద్దన

కద్దని విద్దెను విడిచితి హద్దులు మీరిన్

మొద్దువి ఈ రెండెద్దులు 

వొద్దుర నీకివి చదువుము యుద్ధతిపొందన్

త్త

అత్తా అత్తరు సీసా

ఉత్తది ధనమిత్తువటనె కొత్తది తెత్తున్

చెత్తకు వేయర సత్తిగ 

ఉత్తుత్తీ సుత్తి మాని కొత్తది ఉందీ.

ణ్ణ

కర్ణమున పుట్టి కర్ణుడు 

పర్ణముపైపెట్టెలో జనార్ణవ మేగెన్

కర్ణుని వర్ణన తరమే

వర్ణవివర్ణము సవర్ణవర్ణన చేయన్

డ్డ

యెడ్డెము తెడ్డెము జిడ్డున్

దొడ్డది యడ్డమగు పాము నొడ్డగగడ్డై 

వొడ్డాణమొడ్డె కాకియు

యడ్డమగు పుట్టలొ, పాము నడ్డియువిరిగెన్

ట్ట

అట్టిట్ట చూచి గుట్టుగ

పెట్టె పగులగొట్టి పట్టు చీరెలు తీయన్

చిట్టి కనిపెట్టి దొంగను 

తిట్టెను మొట్టెను చివరకు నెట్టెను కొట్టెను

జ్జ

బుజ్జాయి బుజ్జి బొజ్జకు

అజ్జీర్ణ మొలదెని కజ్జికాయలు గుజ్జుల్

మజ్జిగగుడిపెనుబెజ్జమ

ముజ్జగముల బుజ్జియనుచు ముద్దుగ బుజ్జీ

బుజ్జికి గజ్జెలు గారెకు

బెజ్జము బొజ్జయు గణపతికెంతో అందం

మజ్జయు ఎముకకు కన్యకు

లజ్జయు ఒజ్జలు బడికిని కావలెబుజ్జీ

చ్చ

మచ్చలయావది ! పచ్చని

పచ్చిక కుచ్చువిడమెచ్చి పలుపాలిచ్చున్

మచ్చలదది! పనికొచ్చా?

మ్రుచ్చుది, పిచ్చిదని తన్న  నొచ్చును చచ్చున్.

గ్గ

ధిగ్గున ముగ్గురు జగ్గులు

మగ్గులు పెగ్గులు కొనిరట భగ్గున మండన్

బిగ్గర గరచి మొగ్గిరి

సిగ్గులు ఎగ్గులు విడచిరి నెగ్గిరి తగవున్

క్క

రెక్కలు ముక్కలు సలిపీ

లిక్కితొ చక్కగ బొరుసులు చెక్కి తినక్కా!

పిక్కలు, చెక్కిలి నొక్కులు

ముక్కును ముఖమునిటుచూడుమొక్కటి గొనుమా!